Wunpawng a Maka

            "Hpan wa ningsang chye wa ningchyang hpan da ai ngai W.P., ga kata manu daw dan nlu ai, ja lungseng ni, ga ntsa maisak mailung hkum sumhpa tsi hkrung tsi nan she gabrat, du sat du myeng u num-ji ni hte ning ngai ai ga, ngai W.P. a dai daw lamu ga", ngu ai mahkawn ga yen ni hpe sumpyi dum let yi sa yi wa, gat sa gat wa kade sha pyaw a hka. Ra marin, law hpa, manawn masham hte nju ndawng ai mung ngai hta nrawng ai. Madu jaw ai chyeju hte hpring zup kup ai W.P. a ginra hpe yu mada gawan gatsan hkawm yu shagu wa le, du ai shara shagu, du-hkra ladaw shagu pu tsawm noi abya ai pan-tsun pan-lawng ni, chya-hkyi shan nga du sat du myeng ni, u-ri u-gan u numji ni hte hpun kawa ni a nsam shingni ni wa le, yu nlaw, mu nma, ngai W.P. myit dik myit pyaw la nngai le. W.P. a htingbut htingra dum nta hkrang wa mung, hpun kawa, shangu hte ngang ngang kang kang rai, kawa chyinghkyen hte nan rai nga ai. Katsi kahtet, hkamja lam a matu gaw ngai W.P. a dum nta wa grai she htuk manu dik ai oi. Ginhtawng jan rawt hta wa tim layit nra ai. Lanam marang ni htu aya tim, garu gachyi hpa nna madat nlaw ai yu-ngwi nsen zawn she nawn nngai oi. Dai zawn nsim nsa marang htu yan bu ai ten gaw W.P. a dawdap na dap grup yin hkainu si ju kapaw sha chyai rai, kade she nra rung, marit ningtsin pru shara wa le. Nshung jan tsaw wa nna, saiwan ka-up let katsi bungshi ni nau wa hpyau wa ai ten ni hta gaw, hpun jum nawn tawn ai wan dap grup an-nu wa ni matsut matsat rai, nshung jan hpe la ra, aw marit maroi prat shingna wa i! Nshung jan sha ndap wa dingsa gaw, nbang na u dingla kade goi tim, nta n-pu na nga hkawn yen nu wa ni a sharat mung nna, ntawt na gwi mut yen nau ni a nsen mung zim zam rai yawng gaw u dingla she yup shayu ai zawn zawn rai nna kalang bai yup mang kahtap mu hkra. Hprang wa ai ten gaw nshung jan pyi bai nhkyeng wa magang sai le.

              Shaloi she ji magu la malau W.P. a mungkan (madu jan) a nsen kaba "rawt rawt, yawng rawt, man myit", nga rem ra ai, hpun hta ra ai, yi ra de mung u gawn ra ai. W.P. a mungkan lawan ladan gan shadu kachyawng jaw ai shat hpe sawn-htang ntsin hte shan jahkraw ni hpe W.P. a shadang sha ni hte ga n-tan shaga dam, lawan sha adit lang nna gaw nta gawt yawng mawng bram. Nga rem, u gawn, hpun hta bungli gu ra hte nshung jan nshang shi ai laman ten na W.P. a nta masha ni kyin kyin ai wa. Hkam hkam u ngoi, tsing du tsing man hkan mari kap ten, nsin rim wa ten she yawng gaw W.P. a shangu nta wa hpang de bai wa rai. Du ai hte rau u dingla hpung ni hpe hkan e dun ndun hti shagu yu ra ai. Dai hpang e gaw shani ting ti-nang mu hkrum ai ni bai tsun htai lai hkat rai pyaw la ai wa oi.
            Yi ra mangai ngai, ginhtawng htawng ai hte ngai W.P. n-gaw woi htawt ai gaw, matsaw bum majoi shingra kawn, hka nam mali nmai wa-lawng, pa layang de woi anawt hkrat wa ai gaw, W.P. a aru arat ni galu kaba maden wa mu ga myit shingran ai majaw nan rai nga ai. Dai majaw W.P. a kasha ni hpe hkumra manau nau pa woi nau let shaman machyai kumran nga pra mat wa shangun ai gaw. Sinpraw de Miwa, sinna de Kala mung, mali nmai hka kau Manmaw hte Sam mung shara shagu W.P. a sai daw sai chyen ni law htam mayet maya wa ai gaw lamu na shagan, panglai na zaibru zawn she rai wa masai le. Raitim, W.P. kasha ni e, nanhte buga kaw nnga ma ai majaw kun. Ngai W.P. madaw nau tsit tsawm manu dan la ai majaw wa kun gaw e. Shan hpe sha na, sau hpe shaw na, nra du naw gawa na chyasam ni wa, nhtung kaw shang dung shara la nga masai le. Dai gaw langai ngai tinggyeng myit ai a majaw kun? La n-gam nang ( jinghpaw ) i? (sh) La nnaw nang ( zai wa ) i? La n-la i? La n-tu? La ntang i? La n-yaw i? Goi e, wa Karai Kasang e! Marai (6) sha nga ai gaw myit bai n hkrum lachyen lahka, ngai W.P. nchye sharin shading ya ai majaw kun? Layang ga de n-gaw woi htawt anawt yu wa ai madaw shut sai kun? Mahtai gaw hpa wa she rai wa sata! Moi nan-nau ni hpe woi gasup taleng chyai ai lungseng ni nnga sai. Hka kau hkan gabrim gabram ayai taw chye ai aja ni ntaw sai. Nan-nau ni singgoi goi ra la ai Maisak Mailung ni bai ma sai. La n-yaw Rawang grai yu ra ai chyahkyi shan nga kasha ni mung tam nmu sai. Hpun kawa tsi hkrung tsi nan ni hte tsit tsawm ai bum shagawng ni, ya gaw num-hpu hte dun rai. Hka shi hka nu ni hkyet nna u-rat u-tsang ni mung nkam nga mat masai.
            naw matut mayu ai: ra ai kaw shang mye lawm marit.