KC-NL

" WUNPAWNG MYUSHA NI HPANG DE HTUNG HKYING HTE MANAU SHADUNG A LABAU HPE BAI GARUN KACHYAN DAT N NGAI " 

 MANAU SHADUNG HPE SHARAI GA DA
                                                          
Laiza muklum Sinpraw Majoi manau shadung kaw lapu shalun da ai hte seng nna hpaji jaw lam madun la ai laika ni hpe mu hti ai, shingrai dai myitsu ni hpe tinang a amyu htunghkring hpe tsawra ai majaw htap htuk manu ai lam byin na matu shawang myit kaba hte hpaji jaw ai ngu hkap la nna chyeju dum ai lam mung nga nga mali ai.
Shingrai dai hpe sang lang ai lam hku nna bai tang dan mayu ai lam nga ai. Sang lang ai nga tim dai hpaji jaw laika ni hpe ninghkap ai hku n re, hpaji jaw ai ni a ningmu hta a tsawm n myit yu, marai langai lahkawng myit dum ai hku ka da ai manau shadung maka re nga shadum mayu ai hpe chye na ai. Dai manau shadung gara hku ka wa ai, ngu ai hpe bai tang dan ai lam sha re. Manau shadung maka hpe e galai kau mayu yang shi aten ladaw hta hkan nna galai yang she htuk ai. Dai ni n jaw dum yang dai ni jang sa shaprai kau n mai ai. Myitsu n kau mi ginjaw de lung nna hpaji wa jaw ai lam law law rai sai. Shingrai ginjaw kaw na mung manau shadung hpe grau hkum tsup htap htuk ai hku bawsang hte ginra hku ka hkrat wa ai manau shadung maka ni hpe gahkyin nna ginra shagu hte bawsang shagu na manau shadung maka ni hpe mahkawng nhtawm katsi kamang hku ka jahtuk da lu na matu ngai hpe lit jaw da masai. Shingrai manau shadung bai ka ang wa ai shaloi dai ni hpe bai myit yu ra wa na re. Galai ang ai nga jang galai kau na hpa n yak ai. Ka tawn da sai manau shadung maka hpe gara ladat hku ka da sai ngu ai hpe tang dan mayu ai. Ndai manau shadung gaw Shanglawt Asuya a manau shadung re, raitimung shanhte ka ai manau shadung n re, ginjaw salang ni hta mung anhte shinggan de nga ai ni hta htunghkring hte seng nna chye ai ni grai lawm ma ai. Raitimung Sinpraw Majoi htunghkring htingnu dingshawn shang ai hkridip manau hta Wunpawng mungdan a shara shagu na manau joiwa yu sai joiwa ninghkring ni hpe manau garai ndu yang shata mi jau nna shaga gahkyin da n htawm dai ni e matsun ai hku ka da sai rai malu ai. Kaga grai chye ai ni mung naw nga shajang ai. Raitimung dai ni gaw manau madu tai yu ai ni manau poi lawm yu ai ni rai nna manau joiwa ai hpe ningpawt kaw nna ngut ai shani du hkra joiwa yu ai ni n lawm ai. Ndai manau shadung hpe jahtuk ai hta joiwa ninghkring Laja Hkan Naw manau (6) joiwa yu sai, joiwa Ngyem Gum Sau manau (9) joiwa yu sai, joiwa Nbau Yaw manau (4-5) joiwa yu sai, joiwa Npawt La manau (4) hta n yawm ai joiwa yu sai. Miwa mung na joiwa Akawn Brang Shawng manau (10) daram joiwa yu sai, joiwa Dingga Gawng manau (3-4) joiwa yu sai. Ndai ni hpe jahpawng da nna shanhte shada bawngban ai mahtai hte maren manau shadung kaw baren shalun ai rai malu ai. Joiwa ga hta lawu na hte maren rawng ai.
Moi Ninggawn wa magam hte baren ma Ja Bang wang lung lupdang dung nna nga yang ju manau dum shingra nau gam shang baren maka shalun numraw maka shadun dungyi dungla jun nna nau ai nga nna rawng malu ai. Jinghpaw ni num la ai hpe kumba shalai ngu nna tsun ai. Lho Vo ga hku Myi hpawng fin nga ma ai. Hpa majaw kumba shalai ra ata? Baren sama nau manam ai majaw shinggyim masha jan tai na matu n htuk dum nna kumba ninghpang kaw shi a baren sama hpe a rut shatsai kau ai nga ma ai. Kumba shalai ai hpe Wunpawng sha ni hkap la ai rai yang numraw ma Ja Bang hpe hkungran la ai lam teng ra na re. Hpang shani num nnan jan gaw kawa hpe marit ai nga nna tsun ai. Shaloi hpun pyen kaw baren la sumla ka shakap madun jang dai hpe yu len nna jan shadu kau ai. Hpang shani nu hpe marit ai nga nna tsun ai, shaloi baren yi sumla ka shakap madun nna marit shamai ai, hpang shani nta de marit ai nga nna tsun ai shaloi shi a nta gaw hka de re ai majaw hka sumla hpe ka madun da ai. Hka gaw lwi mat wa dingyang kaw hka kau lam de hka dawai hpunbu kapaw nna kayin ai, raitimung bai nhtang kayin nna hka nam de yawng mat wa ai. Dai hpe dai ni na aten hta kashun magyi maka ngu nna tsun ma ai. Joiwa ga hta lahkra hpunbu kapaw ai hpe yu nna shadung maka la ai nga ai, lapai hpunbu kapaw ai hpe yu nna siq maka la ai nga nna rawng ai dai majaw mangbru poi kaw ka ai maka ni gaw lapai hku kayin nna shadung maka gaw lahkra hku kayin ai. Si ai wa hpe lup kau ai hpang shi hpe mangbru ai shaloi mang a malai hkarang da-u ngu nna baren sumla galaw da ma ai. Dai gaw shagrau ai lam rai malu ai. Majun gaw dai hku rai nna ndai prat hta gaw baren sumla n ngu ai sha sut chyinghkyi ngu nna shamying ai hpe chye lu ai. Shingrai lapu la shalun ai shadung hpe dungla ngu nna lapu yi shalun ai shadung hpe gaw dungyi ngu ai nga tsun ma ai. Manau shadung maka ni hpe mahkawng mat wa yu ai shaloi lapu maka lung ai shadung nga ai zawn lapu maka n kap ai shadung mung law law mu lu ai. hpa majaw dai hku byin ngu ai hpe bai sagawn ai shaloi lapu lung ai shadung gaw gumchying gumsa ni a shadung re, dai ni gumchying gumsa mungdan n rai sai, raitimung Shanglawt Asuya a mung masa lam yan hta shadip shahpang lu ai amyu ngu nna tsun ai. Gumchying gumsa gaw prat n dep mat sai raitim Wunpawng sha ni a ningpawt ninghpang mung masa re. Gumchying gumsa hpe gumlau nna gumrawng gumtsa byin wa ai, raitimung gumrawng gumtsa hkrang hte gumchying gumsa hkrang ngu nna ka shachyaw da ai lam n nga ai. Dai majaw gumchying gumsa hte gumrawng gumtsa lapran kaw gumchying gumsa de shanang ai mung masa hte gumrawng gumtsa de shanang ai mung masa law law naw nga ai. Dai majaw shadung maka ni law wa ai lam chye lu ai. Wunpawng sha ni gaw lapu hte seng ai lam nga ani ? ngu yang Wunpawng sha ni a nhpye rai nga ai htawnghkun nhpye kaw baren sumla lung ai hpe mu lu na ga ai. Anhte ma ni ningnan dum matsing wa ai shaloi naushawng ni gaw baren sumla lung ai palawng hpun ai hpe mu lu ai. Dai majaw de a shawng de gaw baren sumla hpe grai lang sai lachyum pru ai. Joiwa kaba Npawt La mahtum La Raw a manau kaw lawu na hte maren joiwa ai Aw…………… Ja ningsang ni, hkanu hkinrang ni, krawn du mu nu ni, Ja Li La Raw, Magwi manang nga ni Ja Li La Raw a shayi shadang pra ni, u gaw hkungran adi ni, shadip lunghkram ni, danlung senghkyu ni. Ja Tsen Ja Tawng a du shayi pra ni baren lungpu pinyawn htingnu, baren la-ing pinyawn zumhting nga nna joiwa ai. Hkrai Nawng yan hkrai Gam a kawa gaw baren re nga ai lam hkai ma ai. Dai majaw tinang a amyu hpe shagrau mayu yang baren ngu ai mying hte shagrau ma ai. Raitimung baren nga tim lapu gaw n rai nga, lapu ngu ai hpe “la” la kau nna pu hpe sha la ai, hpang kaw ren hpe bang ai, “ren’ ngu ai ga gaw lapu hta grau galu ai ngu mayu ai. Ka jumhpa ren ai nga jang ka jumhpa nau galu nna nmai gun ai hpe tsun ai. Shingrai pu ren ngu ai kaw nna baren byin wa ai. Lapu hta grau galu ai gaw lapu sha nga ai, shingrai lapu hta grau galu ai baren ngu ai n nga ai. Dai aten hta shareng shagrau la ai mying re. Shingrai Jan amyu Shata amyu Madai amyu, mahtum mahta amyu nga nna nga shajang ai zawn baren mying mying ai amyu mung nga lai wa sai. Dai baren amyu kaw na shayi sha hpe Wunpawng sha ni la ai. Dai hpe baren num la ai nga nna tsun ai. Ndai ni nga ai prat gaw gara prat rai ata? Ya Miwa mung Tibet bum kaw Jan ni a Hkawhkam hkaw nga ai, nga nna sumla dem da ma ai. Shingrai Jan ngu ai ni hte baren ngu ai ni nga ai prat gaw gara prat re ai lam Miwa labau hta nga ai. Dai majaw dai prat hta Wunpawng sha ni nga sai sakse madun nga ai. Mungolia rusai teng yang lapu masat masa lang ai nga nna labau ninghkring Maran Brang Di tsun ai. Lapu masat masa n lang ai ni gaw lapran kaw hpreq pru ai amyu ni re. Wunpawng sha ni lapu maka lang ai ni gaw labau galu ai lachyum rai nga ai, Mungo rusai teng ai masat masa rai nga ai.
Hpaji jaw ai myitsu ni hku nna Chyoipra ai Chyum laika hku nna grai ngang kang ai hku madi madun da ai lam hpe mu lu ai. Raitimung Chyum Laika ngu ai gaw dai hta kaga mung naw nga ai hpe dum mai ai. Baren hte hkanghkyi gaw Karai Kasang n ra ai teng yang baren hte hkanghkyi hpe hpan ai Karai Kasang kaga naw nga na ang ai. Karai Kasang maga hku nna dai yan hpe n kaja ai hku hpan da sai n rai. Shinggyim masha ni hku nna she n kaja ai hku lachyum lat la sai lachyum rai nga ai. Dai hku n kaja ai lachyum lat la ai shinggyim masha ni hta Israel masha ni mung lawm taw nga ai. Yesu hkristu a kabu gara shiga chyum laika buk mali kaw na mahte laika hpe hkanghkyi ngu nna shingran laika hta madun da ai. Dai hku nga yang Mahte laika hti ai wa gaw hkanghkyi myit rawng wa na sha re. Raitimung Chyum laika a madu gaw hkanghkyi hpe n kaja ai hku nmu ai majaw Yesu a mungga hta bang da ai lam rai nga ai. Egutu mung kaw na Israel hpe hkye la na matu Yehowa Karai Kasang gaw Maw She hpe shangun sai. Maw She hpe asung jashawn sai. Dai majaw Maw She lang ai arung arai ni mung Karai Kasang a arung arai tai ma sai. Maw She a dawhkrawng hte lapu shatai da ai hpe Hparau a hpaji ninghkring ni jawm kawa ai, Maw She a lapu sum na zawn rai wa ai, raitim Maw She a lapu e Hparau a lapu ni hpe kawa sat kau ai. Maw She gaw hpa majaw Hparau hpe gasat na matu Yehowa kaw na laknak n wa la sai kun? Hparau lang ai lapu hpaji hte sha Hparau hpe dang hkra gasat ai. Shingrai lapu hpe gasat dang na matu lapu ra ai. Baren hpe dang na matu baren hte gasat ra ai, hkanghkyi hpe dang na matu hkanghkyi ra ai. Nang hpe Karai Kasang lang na sha ahkyak ai. Nang na laknak kaja na matu n ahkyak ai. Israel ni nam mali kaw wa yup ai, Lapu e masha ram ram achye kau ai, jahpawt nkau mi n si ai sha ngam ai, shahte mai wa lu na matu Maw She gaw lapu sumla hpe sharawt da sai. Lapu achye hkrum ai ni yawng dai lapu hpe sharawt yu na matu tsun ai. Lapu achye nna machyi nga ai ni lapu hpe nkam yu ai ni si mat ai. Sharawt mada yu ai ni gaw hkrung wa ai, lapu e shamai ai n re, lapu hpe yu ai gaw Maw She hpe kam ai re, Maw She hpe kam ai wa gaw Yehowa hpe kam ai wa re. Dai lapu sumla gaw dai ni tsi hte seng ai tsi rung kaw sharawt da ai lapu sumla re ai nga nna mung tsun ma ai. Yesu a mungga hta lapu zawn hpaji rawng mu nga nna rawng ai. Lapu jawng lung na matu matsun nga ai. Lapu gaw shinggyim masha ni a sara re ai lam hpe tsun nga ai. Dai majaw Chyum laika hta lapu a lam hkawp myitsu ni madi madun ai ja Chyumga hta kaga ja Chyumga naw nga ai hpe tsun mayu ai. Miwa hte Jinghpaw hpyen re ani? jinghku re ani? Wunpawng sha ni a ginru ginsa hkrunlam hpe a tsawm hkrak chye mayu yang Miwa Labau hpe yu ra ai, Miwa labau hta Jinghpaw ni a lam san san nrawng ai raitim shanhte mazing da ai laika ni hta Jinghpaw a lam rawng shajang nga ai. shingrai Miwa mat jang Wunpawng sha ni a ginru ginsa labau mung mat mat lu ai.
Ka-ang shinra ga ngu ai hpe joiwa dumsa ni tsun ai Rawang ngu ai mung ka-ang masha ni ngu ai re da. Chyung Goq ngu ai mung ka-ang masha ngu ai re da. Anhte gaw Miwa n re ai teng ai, raitimung Miwa hte rau nga hkrat wa ai sakse ni nga ai. Miwa gaw laika jau lu nna matsing sumhting da ai lam jau jau nga sai. Anhte gaw ya du hkra matsing sumhting la ai lam n nga shi ai. LhoVo ni a labau hta “Byu byaw nga lawng bam” ngu nna rawng ai. hpa hpe tsun ai rai ta? ngu yang Tibet ga re da. Nga lawng ngu ai gaw nga wu dat ngu ai re da. Nga lawng ngu ai hpe Jinghpaw ga hku nga lawng ngu bai tsun ai. Raitimung Tibet ga nga lawng hte Jinghpaw ga nga lawng gaw lachyum bung timung hkrang n bung ai. Tibet ga hta nga ni hpe dat da ai lamu ga hpe tsun mayu ai. Jinghpaw ga hta gaw nga ni hpe rawng da ai nga nta kaji hpe tsun mayu ai. Lachyum gaw bung nna hkrang shai ai sha re. Jinghpaw labau hta hkranghku ngu ai shara kaw nna shinggyim masha ni si hpang ai hkung-ran hpang ai, wan chye lang ai ngu ai hku rawng ai. Dai hkrang hku gaw Mali hkran walawng kaw langai mi nga ai. Myitkyina kaw na lahkawng na yup yang a pyaw sha du lu ai. Joiwa ga hta rawng ai hkranghku gaw dai mahtang re ani? Miwa mung de hkrang hku ngu ai shara nga ai. Hkrang hka a hkahku kaw Wunpawng sha ni shaning law law ring chying nna nga lai wa ai. Dai hpe moi na Miwa laika hta Hkrang ngu nmai ka ai majaw “gang” ngu nna rawng ai, “hku” ngu ai ga hpe mung shanhte a laika hte nmai ka ai majaw “su” ngu nna rawng ai. Shingrai Miwa mung na lamu ga sumla hta hkranghku n nga ai sha gangsu ngu nna rawng ai. Dai mahtang Wunpawng sha ni majoi ai hkranghku majoi re. Maran ngu ai ni gaw Miwa hku Yang ni ngu nna tsun ai, ndai yang ni gaw nam maling langai ngai kaw na mying la ai ngu nna tsun ai. Yesu garai n shangai yang BC-3000 ning hta Maran ni hkawhkam tai sai lam Miwa mung na Maran labau hta rawng ai. Dai labau hta hkawhkam hte hkawhkam jan yep yep shaning hte hkrak madun hkrat wa nna, Miwa mung ting a hkawhkam masa hten ai shaloi she hten mat ai. Dai hpe anhte myi di lang nna ningdang n lu ai. Chyum laika na hte maren nga jang dai aprat gaw Adan yan Ewa a prat rai nga ai. Raitimung Israel labau hte Maran ni a labau gaw kaga ga re. Karai Kasang a mungga gaw Israel labau hte htunghkring hte makai da ai laika re. Dai majaw Karai Kasang a mungga chye mayu yang Israel labau hte htunghkring hpe shawng chye ra ai. Tinang a labau re ai majaw shareng ai n re. Karai Kasang a mungga chye mayu nna shareng mayu ai she re. Dai majaw Israel a labau hpe tinang a labau hku n mai myit la ai. Wunpawng sha ni a labau hta sha-u ing ai lam rawng ai. Dai sha-u gaw Ja Nyi yang Ja Nga a prat hta ing ai. Israel a labu hta gaw Naw A a prat hta rawng ai. Ja Nyi yan Ja Nga hte No a gaw rau pra sai ngu n mai myit la ai. No a a prat hta ing ai sha-u hte Ja Nyi yan Ja Nga prat hta ing ai sha-u gaw aten kaga ga re, lachyum gaw bung ai. No a a prat hta ing ai sha-u gaw Karai Kasang hpe n kam ai majaw ing ai. Ja Nyi yan Ja Nga a prat hta ing ai sha-u gaw nat njaw mat ai majaw ing ai sha-u re, dai majaw Karai Kasang hpe kam ai ngu ai hte nat jaw ai ngu ai gaw lachyum kaba hku maren sha re. Tibet bum kaw Miwa amyu ni moi na rai ningsa ni hpe htu sawk yu ai shaloi Ja hte galaw ai nhka kinyang, shawa nang hkachyi, hturen sumpyi ni hpe mu htu ai. Ndai arung arai ningsa ni gaw Yesu garai n shangai yang na shaning hkan lang ai arung arai re. Dai hku rai yang Jinghpaw ni gaw BC a shawng kaw nna nga sai lachyum pru ai. Tibet bum ga kaw nta hpe grai ba shawng ai hku lapa hpe shara mi wa hkrum ai hkrang galaw da ai. Hpa majaw nga yang dai shara kaw udi daram ram kaba ai sin ni hkrat chye ai. Marang hka hpundaw n shang na matu de a makau grup grup gaduk htu da chye ma ai. Hpang na daw hta lapu zawn re, tsap zawn re ai ni shana n sa lu na matu kaduk hpe masha tup jan jan htu gawan da chye ma ai. Dai gaduk hta shani e mahkrai hkrai nna shana e gaw dawm kau chye ai. Dai gaw Majoi shingra ga na Jinghpaw nta re. Raitimung gahtet ga de du ai shaloi shing nrai sin n hkrat ai ga de du ai shaloi dai nta hkrang ni gaw galai mat ai. Dai hkrang ningnan gaw anhte rawng lai wa ai Jinghpaw htingnu ni rai nga ai. Masha si ai shaloi si ai wa a numla hpe moi na buga de tsu shawawn ra ai. Shingrai shi nta hpe moi na nta hkrang galaw ya ai. Dai hpe Jinghpaw lup ngu nna tsun ai. Dai majaw majoi shingra ga de nta rai timung ndai ga kaw gaw lup rai mat ai. Nta ngu ai gaw masha a matu mai kaja ai. Lup ngu ai gaw masha a matu siq lam rai nga ai. Dai majaw lapu baren a lachyum hpe tsun ai shaloi mung moi na ni lachyum lat ai hte ya na ni lachyum lat ai lam shai mat ai re.

WUNPAWNG SHA NI HTE MANAU SHADUNG
                                                              
1948 ning jannuary 10 ya shani Shanglawt padang manau hpe nau saga ai. Dai gaw bawsang (6) ting a manau re. Bawsang (6) re ai hte maren manau shadung mung (6) rai wa ai. Joiwa ai lam mung ga hta hkan nna shai hkat ai. Dai majaw Jinghpaw manau hku dum na myit hkrum sai. Jinghpaw manau hku dum ga nga yang Marip, Maran, Lahtaw ni a manau mung naw shai hkat ai. Dai majaw dai manau hpe Lahtaw Karing ni a manau hku dum sai. Madai nga ladi mung duwa Karing La hpe jaw sai. Nat maga de na manau madu gaw Lahtaw ni a gumgun nat Ngaw Naw re, Nhkut hpawnat gaw Bawng Wang ga na Lashe mu nat re nga ma ai. Shingrai Shanglawt manau hpe nat jaw htung hku nau lai wa sai. Shing rai shadung pawt kaw shadung matsu lup sai. Shingrai n dai shara kaw manau dum shagu matsu galaw ra ai. 1970 ning jan ning hta dai shara gaw shatapru ni a nga rem dabang, lapu tsip gatjan tsip tai mat ai. Dai hpe Miwa ni yu lahpawt nna Taimu Kyaw Ba kaw hpyi ai. Taimu gaw golf ginsup ai shara kaw Jinghpaw lauban ni hpe san yu ai shaloi htunghkring manau pa re nga tsun dan jang manau bai dum mu manau n dum jang Miwa ni hpe jaw kau na ngu bai tsun ai. Dai majaw Jinghpaw lauban ni gumhpraw bai gahkyin nna manau bai dum ai. Raitim jadip n jatsu ai. Kaga nat loi li jaw ai, dai nat hkungri ni gaw Hpung-up sara U hkru La Ja a nta de shang wa ai numshe kaw ang ai. Shingrai Hpung-up sara La Ja a nta kaw nat jaw sha ai zawn byin wa ai. Dai hpe sa baw kabai kau ai, shi mung dai shaning sai rawt ana ningtsa de 200 kaw nna nyu hkraw ai hpang jahtum si mat ai. Dai hpang e kalang bai dum ai, shadip n jasu ai nat mung n jaw sai. Nbawn lup hpung na hpung-up sara Hpa Zau Awng akyu hpyi nna dum ai. Dai shaning hta hpung-up sara Hpa Zau Awng si mat ai. Manau wang yu lajang komitte hpaw ai dai shaloi ningbaw gaw du kaba Lamung Gam re. Dai aten hta sengke galau nna du kaba Lamung Gam a lagaw daw mat ai. Shi a hpang kaw hpungtau Sana Zau Ra ningbaw tai ai. Dai shaning hta n nga mat ai. Dai hpang duwa La Roi ningbaw tai ai, shi mung ningbaw tai nga ai aten hta n nga mat ai. Shi a hkang kaw sut du Yup Zau Hkawng ningbaw bai tai ai, shi mung lagaw daw mat ai. Dai majaw nat jaw ni gaw lahta na lam ni hpe myit matut nna manau hpe pagawn n nau na matu manau komitte de tang shawn ai. Shingrai manau komitte hte bawsang kasa ni zuphpawng hpawng ai. lahta na lam ni hpe nat jaw ningbaw La Nga Zau La tang shawn ai. Dai hpe jawm bawng garu nga yang Lachid bawsang kasa rai nga ai sara Hkaw Chang gaw matsing buk hte bawpen lang let rawt tsap wa let Wunpawng htunghkring manau kaw nanhte natjaw ni hkum shang shuk ngu tsun hpang wa yang matsing buk ga de hkrat bang mat ai. Dai hpe gum hta ai nga yang shi mung galau mat ai. Madaw hte tsirung de gagat ai tsirung ndu yang n sa hti mat ai. Shingrai shadung shadip hpe lam a jan shang maga de htawt kau ai. Dai shani kaw nna manau pa kaba kaw angwi apyaw sha manau dum lu ai.
 

HKRISTAN HTE MANAU SHADUNG

Kalang mi Kut Kai kaw hpung zup hpawng hta manau dum ai, hpungup sara kaba Zau Yaw gaw naubaw hpang wa na matu a kyu hpyi ai. Dai aten hta dingla langai mi gaw shadung pawt kaw tsa jaw nna matan ai. Hpungup sara wa shi nta garai ndu yang laru kaba wa nna Kut Kai pa na hpri hpraw ni bum ga de yawng pyen lung mat ai nga ma ai. Kyu hpyi ai mahtang shut ai kun tsa hprep ai mahtang shut ai kun n chye ginghka ai. Jaw masat poi hta manau dum na n dum na hte seng nna KBCEC hte Jaw masat shabyin shatai komitte ni gaw masum ya ting bawngban ma ai. Dai zup hpanwg hta dum ga nga ai ni nga ai zawn n mai dum ai nga ai ni mung nga ai. Shingnrai hpang jahtum e ra lata la ai shaloi dum ga nga ai maga de marai mali manga jan ai. Shing rai Jaw masat poi kaw manau dum na hku rai sai. Ngai mung Jaw masat garai n du yang Jaw masat poi shaga ai hku na bum ga de n dau hkawm ai de lawm mat ai. Shingrai bum ga na salang n kau mi hte chye hkat ai. Jaw masat poi du wa ai shaloi bum ga na salang ni du ai, ngai hte chye hkat ai salang langai mi gaw manau shadung hpe madun nna ndai hpabaw shadung rai nga nna san ai. Ngai mung hpa nchye tsun jang Jaw masat shadung re ngu nna sha tsun dat ai, shaloi dai salang wa mung manau shadung ndai manghkang nga ai nga nna anyam nna kaga maga de hkawm mat wa ai. Shi tsun ai ga hpe ngai hku nna a hkyak n shatai ai. Dai gaw hkristan nawku hpawng hta shawng dum ai manau re. Dai hpang Yesu hkristu hpe kam sham ai ni sabyi gawm ni htawng kau poi daw muk ni kabye kau, hkristan shada labu malu dan re ai lam byin pru wa ai, n dai ga law lam gaw shawng de ga law ai hte shadawn n dang hkra sung ai ga law lam re. Tinang hkungga dik ai sabyi gawm hpe kabye kau gwi ai gaw nat shung ai lam re. Dai majaw ngai langai hku nna gaw htunghkring hku manau dum ai lam hpe Karai Kasang ra sharawng na re. Raitimung Nawku hpawng hta dum ai gaw Karai Kasang ra ai kun n rai kun hkrak n tsun lu ai. Manau dum yang na myit masin wenyi hte kyui hpyi mahkawn hkawn yang na wenyi gaw kabu ai wenyi hkrai re. Raitimung kabu ai namchyim kaga ga re.

  GA HPUNGDIM                                                        

Sinpraw majoi manau shadung gaw Shanglawt Asuya a manau shadung re raitimung htunghkrung manau shadung re ai majaw htunhkring salang ni ka ai shadung maka re. Shingrai manau shadung hpe dinglun ai shaloi Manau shadung ka ai wa hpe tsun mayu ai rai na re. Raitimung shawng de na ni zawn seng ang ai ni hte sa jahkrum nna hpaji sa jaw da ai gaw kaja ai. Ginjaw salang ni mung myit yu ai. Shingrai manau shadung maka jahkum da na matu ngai hpe lit jaw ma ai. Dai majaw bai ka wa na ten hta hpaji jaw da ai hpe myit yu nna bai ka wa ra na re. Dai hku nre ai sha masha ji nban mungkan ting na na hku tsun shabra ai lam gaw shanglawt Asuya hpe jahpoi ai maga de yawng wa ai, Shanglawt Asuya hpa n chye ai ngu ai lachyum pru wa ai. Shingrai na la ai mung masha ji nban ni hta mung n kaja ai nga ai ni nga ai zawn, kaja na sai nga ai ni mung nga ai. Shingrai mung shawa hpe myit shabra ai tai wa ai. Hpaji jaw ai lam gaw ra ai, raitimung jaw ai ladat shut jang ra ai de n yawng ai sha n ra ai de yawng wa chye ai. Ndai aten hta anhte gaw n lagawn ai sha atsam dat na hte kahkyin gumdin makai hkrak na gaw grau ahkyak ai re. Anhte kata na sharai la mai ai baw ni hpe shada da hpai hka shayawn hkat yang n hku de man yanwg nna goi ai u hte bung nna hkrat sum ai de yawng chye ai. Manau shadung hte seng nna lamu gang hkau de shalun hkra tsun ningdang n ra ai hpe tsun mayu ai. Shawng de Shanglawt dap kaw hpyenla langai mi nga ai Wunpawng shalawt nga jang si si htan htan gasat na, Jinghpaw shanglawt nga jang dai na de wa mat na nga nna tsun ai. Kade n na yang shi a hkang hte wa mat ai shi wa mat ai hte rau Wunpawng shanglawt ngu nna mying galai kau ai. Raitim dai ni du hkra shi bai n sa sai. Shi hku nna shanglawt dap de sa na matu manaw manang hpe shadut ai lam mung n nga ai. Ngu mayu ai gaw manau maka hpe galai na matu hpa n yak ai, galai kau dat ai hpang gang shaw ai zawn awng dang wa yang gaw grai kaja na re, galai kau dat ai shani kaw nna wunpawng sha ni n ni n kri grau sawng wa yang gaw gadai pahkam hkam lu na ata?

                                                                                                                                            Tang shawn ai Pungga Ja Li
                                                                                                                                             Labau hte Htunghkring Sawk sagawn
                                                                                                                                             Sinpraw Majoi Htingnu, Laiza