Tsawra ai hpu nau ni e,
Yawng ngwi pyaw hkam kaja nga mu ga law.
2009 ngu ai shaning gaw galai mat wa magang sai hte 2010 ngu ai shaning ningnan gaw anhte hpe kabu gara hkap tau la magang taw nga sai law.
2009 hta anhte langai hte langai gaw chyeju lam amyu myu hkam la lai wa na saga ai. Anhte a hkum hkrum ta tut lam ni yawng gaw chyeju ni hkrai rai nga ai law. Nkau mi a matu gaw, 2009 hta tinang hkam la lu ai kabu hpa lam, pyaw hpa lam chyeju nlang hte hpe bai myitdum hti yu nna myitmu myithkut ai hte 2009 hpe chyeju dum let shakram da mai nga ga ai. Dai hte maren, nkau mi a matu gaw, 2009 hta hkrum hkra lai wa ai mahkrum madup lam amyu myu, myitru myityak lam amyu myu kaw nna, sharin la lu ai lam amyu myu a majaw, chyeju dum let 2009 hpe shakram da mai nga ai law.
Ndai zawn re shaning galai wa ai aten hta gaw anhte langai hte langai aten la nna anhte a lam ni hpe myit yu, sumru yu na aten mung rai nga ai law. Shaning dingsa hta anhte tawn kau da ra ai lam nkau mi nga ai hte maren, shaning ningnan de matut nna la shang wa na lam nkau mi mung anhte kaw nga nga ai. Anhte a nkaja ai lam ni hpe gaw shaning dingsa hta tawn kau da nna, kaja ai lam ni hpe gaw shaning ningnan hta mung matut kyem da mai nga ai.
Ndai zawn nkaja ai lam ni hpe tawn kau da nna, kaja ai lam ni hpe kyem da na aten hta, Chyum mungga kadun mi hte hpu nau ni hpe n gun jaw shadum jahprang dat mayu nngai law.
Yawhan A Shingran Laika 1-3 hta Yawhan gaw Ehpesu, Samurna, Pergamu, Htuatira, Sardi, Hpiladehpi hte Ladoki mare ni hta nga ai, nawku hpung sanit hpang de n gun jaw shadum jahprang laika ka dat ai lam hpe mu lu nga ai. Yawhan gaw, nawku hpung ni a shakut shaja ai lam hte gawng kya ai lam ni hpe tsun shadum ai zawn, naw sharai ra ai lam ni hpe mung n gun jaw shadum jahprang lai wa sai. Dai hte maren, dai ni anhte hta mung hpa baw lam ni gaw anhte a shakut shaja ai lam ni rai nna, hpa baw lam ni gaw anhte a gawng kya ai hte sharai la ra ai lam ni rai nga ai ngu ai hpe mu lu na matu ndai mungga hpe ka shagun dat nngai law.
Ehpesu mare na nawku hpung a kasa gaw tsin yam tsin dam ni hkam nna nhki nba ai hte amu bungli shakut shaja ai; kasa hpyi hpun ai ni hpe shadan shadawng kau nna hpung hpe makawp maga ai; raitimung, shawng na tsawra ai lam hpe kau tawn da ai. Dai majaw dai shawng na tsawra ai lam hpe mung bai shakut shaja na lam Ehpesu nawku hpung a kasa hpe shadum jahprang da ai hpe mu lu ai (Shingran 2:1-7).
Samurna hpung a kasa gaw zingri zingrat hte matsan mayan hkrum hkra nga ai. Hpung masha nkau mi mung htawng e sharen da hkrum ai nga ai. Dai zawn hkrum sha ai masha ni hpe si hkra maju jung nga na matu n gun jaw da ai hpe mu lu ai. Dai zawn si hkra maju jung nga yang gaw Madu Yesu a htani htana hte seng ai asak lu la na re lam mung mu lu ai (Shingran 2:8-11).
Shingran 2:12-17 hta, Pergamu nawku hpung a kasa gaw Yesu Hkristu hta manoi manat nga ai rai tim, kaga nawku htung lam ni hte seng nna hpung masha ni myit kataw shara galaw ai majaw, myit malai lu na matu shadum jahprang dat nga ai.
Shingran 2:18-29 hta, Htuatira hpung gaw tsawra ai lam, makam masham lam, magam bungli lam hta shakut shaja tim, kaga nawku htung hpe mung hkan wa ai majaw myit malai lu na matu shadum jahprang dat ai.
Shingran 3:1-6 hta, Sardi hpung gaw makam masham lam, wenyi lam hta gawng kya mat wa nna nawku hpung gaw si wa magang nga ai majaw, ngam nga ai hpung masha ni a makam masham lam hta shadaw shangang ya na lam hpung a kasa hpe shadum nga ai.
Shingran 3:7-13 hta, Hpiladehpi hpung gaw mungga hte maren hkan nang hkan sa ai majaw Karai Kasang a nawku Htingnu hta daw nu shatai na lam n gun jaw nga ai.
Singran 3:14-22 hta, Ladoki hpung hta gaw kahtet ai mung n rai, katsi ai mung n rai, lum nai rai nga ai majaw, dai zawn re ai hpe Yesu gaw nra sharawng ai lam shadum jahprang dat ai. Makam masham hta ndai zawn zawn, waw ra zawn zawn rai gara de mung nrai rai re ai lam nnga ai sha, gara makam masham de rai tim, hkrak htep lahti hkap la kam sham na lam shadum nga ai.
Yawhan gaw nawku hpung sanit hpe n gun jaw ga hte shadum jahprang dat ai zawn, dai ni anhte ni kaw mung hpa baw lam ni gaw anhte a kaja ai lam ni rai nna, hpabaw lam ni gaw anhte sharai shading la ra ai hpe myit sumru yu let, shaning ningnan kaw Madu Yesu tsawra ai hku nna hkawm sa ga ngu n gun jaw shadum jahprang let hpung dim dat nngai law.
Tsawra let,
Rev. Marip La Rip
Shaning Ningnan Mungga Kadun
0 comments:
Post a Comment